阿蘇做主角送洛帥一程
周日晚上西甲大戰，巴塞隆拿主場同皇家馬德里上演今季首次西班牙「國家打吡」。「銀河艦隊」今季表現大失水準，搞到「艦長」洛佩特吉帥位危危乎，呢場作客面對死敵兼聯賽1哥巴塞好難過到骨，一於捧主勝。
（Now 632周日晚上11時15分直播）

美斯同C朗喺西甲鬥足咁多年，一直係「國家打吡」嘅焦點，可惜美斯早前手部受傷，令呢場係繼2007年之後，11年以嚟首次雙方正選陣容冇「斯C」嘅打吡戰。
雖然冇咗兩位風頭躉，不過呢場傳統大戰依然充滿話題性，皆因由前西班牙國家隊主帥洛佩特吉領軍嘅皇馬，近4仗聯賽慘吞1和3負劣績，士氣同狀態都跌落谷底，喺聯賽榜暫列第7，昔日「銀河艦隊」嘅王者風範蕩然無存，要求高又威慣嘅皇馬球迷梗係唔收貨，至於不嬲見風駛舵，跟足輿論做嘢嘅球會高層，逐漸都對呢位教頭失去信心，盛傳會長皮里茲賽前透露無論今仗賽果如何，洛帥一樣要落鑊，「潛台詞」即係睇死佢贏唔到啦！洛佩特吉仲點會有心機應付呢場大戰呢？

巴塞今季主場未輸過
過往皇、巴兩軍被譽為「西超」球隊，其他18支西甲球隊都只係陪襯，不過近一、兩季佢哋嘅優勢都明顯減弱，皇馬現時要做「7仔」不在話下，就連巴塞都只係憑得失球差，壓過同市死敵愛斯賓奴做1哥，不過比起近況低迷嘅皇馬，巴塞整體表現明顯要弗得多，尤其大熟大勇嘅蘇亞雷斯，今仗美斯養傷缺陣，呢位烏拉圭射手難得擔正做「男一」，肯定加倍搏命，有佢搭住菲臘比古天奴攻堅，加埋日漸成熟嘅艾法美路喺中場較炮，巴塞坐鎮今季未嘗敗績嘅主場應可KO皇馬，等「艦長」洛佩特吉「安心上路」！