跌Watt艦隊讓波濕滯
周日凌晨西甲重頭戲，「銀河艦隊」皇家馬德里將會主場同馬德里體育會合演西班牙首都打吡。皇馬上仗輸波收場，聯賽不敗走勢斷纜之餘，攻力都明顯下滑，今仗面對近年交手表現硬淨嘅馬體會難有勝算，馬體會受讓必捧讓球客勝。

（Now 632周日凌晨2時45分直播）

上季趁住皇馬喺聯賽甩轆，最終奪得西甲第2嘅馬體會，今季成功留住頭號球星基沙文，仲揾埋佢嘅國家隊好拍檔湯馬士林馬，志在加強球隊進攻火力。呢兩位法國兵啱啱喺俄羅斯捧起世盃，實力同默契都有保證，而且仲將好勢頭帶到嚟西甲賽場，堪稱係馬體會開咧至今表現最好嘅兩位進攻球員，搶分絕對靠晒佢哋。

不過數到馬體會最耍家嘅，肯定係佢哋嘅穩陣防守，以烏拉圭中堅高甸領銜防線，喺各項賽事近3仗只失1球，協助球隊聯賽2連勝升上積分榜前列位置，今場預計都唔會畀皇馬球員太多進攻空間。

艾斯高長抖賓施馬冇態
況且今季開局強勢嘅皇馬，近期狀態突然下滑，繼早前聯賽遭實力一般嘅畢爾包以1比1逼和之後，周中快車再次失分，淨吞西維爾3蛋。毫無還手之力，皆因球隊進攻效率大不如前，其中前鋒賓施馬近4仗上陣都食白果，令人擔心佢會唔會重現上季唔識入波嘅疲態，加上進攻發電機艾斯高有傷要長抖，進一步削弱皇馬前場火力。回顧往績，皇馬近6次聯賽同馬體會交手1勝4和1負，根本無優勢可言，今場戰況隨時陷入膠着，讓球客勝捧得過。