大營氣氛極差嘅曼聯，周六英超早場作客韋斯咸，踢波最忌軍心不穩，即使擁有最叻嘅領隊同出色嘅球員，唔夠團結就真係嘥氣，周中聯賽盃出局更加引爆紅魔鬼將帥不穩問題，而且翻查數據，曼聯近4季3次聯賽盃出局，之後返回聯賽只能同對手打和，今場要讓「錘仔幫」半一，梗係捧下盤啦！

（Now 621周六晚7時30分直播）

聯賽盃出局下場例和波
曼聯主帥莫連奴已經唔係以前係球員都想跟隨嘅領隊，最大問題係以前佢槍口向外，依家成績差就公開話球員，畀人感覺係卸責。周中聯賽盃12碼射輸畀打比郡，喺依家更衣室氣氛唔好嘅情況下輸波，相信頹勢會延續。其實近4季紅魔鬼有3季聯賽盃被淘汰之後，返回英超都只能同李斯特城、水晶宮及般尼打和，即使2016/17年勇奪聯賽盃冠軍，之後嗰場聯賽都係同般尼茅夫打踢成1比1，都咪話唔邪。

韋斯咸經過季初聯賽4連敗後，先擊敗愛華頓，再喺主場同車路士踢成0比0，周中聯賽盃更大炒乙組仔馬爾斯菲8比0，成班波重拾信心，而且「智利工程師」比歷連尼之前喺英超同莫連奴交手，獲2勝2和2負不落下風，雖然大家手上班兵唔同，但心理上唔會輸蝕，韋斯咸主場受讓，絕對捧得過。