意甲今晚上演重量級大戰，力爭聯賽8連霸嘅榜首祖雲達斯主場硬撼2哥拿玻里。祖記今季加入基斯坦奴朗拿度（C朗）後，實力如虎添翼，加上祖記近年主場專剋拿玻里，主隊讓半一必捧上盤。

（奇妙電視77台及Now 638周日凌晨零時直播）

自2011/12球季開始，祖記已經連贏7季意甲錦標，本身喺國內已經無敵手，今季仲加入埋葡萄牙巨星C朗，實力更上一層樓，呢名前皇馬球星近3場聯賽入3球，帶領祖記喺意甲開季6戰全勝，顯然已適應意甲節奏，相信士哥會陸續有來，更何況C朗嚟緊周中主場對瑞士年青人嘅歐聯分組賽需要坐波監，今場更加無後顧之憂，可以拚盡爭取入波。

拿玻里防線唔穩陣
拿玻里今季改由安察洛堤執教，開季6場聯賽5勝1負，成績僅次於祖記，不過佢哋作客曾經輸畀森多利亞0比3，對住拉素、AC米蘭等勁旅亦係先失波，後防表現唔夠穩定，如果今場對祖記又再先失守，想反勝絕對唔易。拿玻里上季尾喺爭標關鍵戰雖曾作客勇挫祖記，但之前6季聯賽，拿玻里作客祖記全部輸晒，其中4次仲輸2球或以上，祖記係5大聯賽入面，唯一保持開季全勝球隊，以祖記目前氣勢，拿玻里作客難做攔路虎，祖記讓半一波童捧上盤。