歐國聯C3上演2場賽事，其中斯洛文尼亞主場對希臘最有睇頭，兩隊踢法守強過攻，實力上希臘似乎較強，但首戰互相試探機會大，預料半場和波機會大；同組摩爾多瓦主場對科索沃，科索沃去年歐國盃外圍賽表現令人眼前一亮，而且對「魚腩部隊」特別有計，今場勝望濃。

（周五凌晨2時45分開賽）

斯洛文尼亞最矚目球星要數馬德里體育會鋼門奧比歷，馬體會西甲近5季失球數字都喺30球以下，奧比歷功不可沒。早前有消息指車路士希望收購奧比歷，馬體會索價1.2億歐元，斯洛文尼亞有佢把守最後一關，半場保持不失唔奇。進攻方面，斯洛文尼亞有士砵亭前鋒安達斯史保亞負責入波，呢位26歲射手上季葡超攻入6球，表現唔失禮。

科索沃明恰摩爾多瓦
希臘國家隊成員主要來自本土，由幾支勁旅ＰＡＯＫ、ＡＫＥ雅典、彭拿典奈高斯同奧林比亞高斯球員組成，近期最受注目嘅，相信係剛加盟利物浦嘅後衞森美卡斯。佢哋守強過攻，遇上近4場3次開半和嘅斯洛文尼亞，半場應會拉成均勢。

至於摩爾多瓦對科索沃，摩爾多瓦一向係「魚腩部隊」，科索沃實力唔弱，去年歐國盃外圍賽一度有出線機會，最後僅輸畀捷克排小組第3，佢哋有蘭斯孖寶艾巴辛尼利及華倫貝利沙助陣，上屆歐國聯喺D3踢6場4勝2和不敗，表現唔錯，今場有望贏波。