前線孖寶鋒力強
周五凌晨歐國聯B3組拉開帷幕，俄羅斯主場迎戰塞爾維亞。塞爾維亞老將尼曼查馬迪啱啱宣布退役，中場實力大打折扣，面對有迪斯尤巴同史莫洛夫組成嘅「雙頭鷹」鋒線，相信難以招架，上盤值得留意。

（有線665及605台周五凌晨2時45分直播）

塞爾維亞上屆歐國聯取得C4組首名，今屆升格踢B組。不過塞爾維亞往往遇強即屈，尤其作客面對實力更強嘅對手，經常畏首畏尾，表現同球星名氣唔成正比，去年歐國外就曾經試過淨吞烏克蘭5蛋。

尼曼查馬迪退役影響大
今次國家隊點兵前，塞爾維亞中場核心尼曼查馬迪仲宣布退役，專心為英超曼聯效力，冇咗呢位「中場節拍器」組織攻勢，塞爾維亞整體實力肯定受損。

俄羅斯兩位世盃大軍成員卓利舒夫同高路雲，雖然都冇份入選，但主要由國內聯賽球員組成嘅班底，實力依然有番咁上下，包括由西甲切爾達回流嘅前鋒史莫洛夫，以及辛尼特中鋒迪斯尤巴，後者近19場國際賽上陣轟入13球，着起國家隊波衫表現特別醒，兩位領銜俄軍鋒線，攻力絕對不容小覷。俄羅斯近6仗國際賽主場出擊贏咗5場，喺地頭夠晒惡，今仗有本錢全取3分，上盤好路。