強強對撼唔想先失威
第2屆歐國聯今晚揭開戰幔，A4上演超級大戰，德國主場火併西班牙打頭陣。德國今次未有徵召兩大門神紐亞及達史特根，為鞏固防線唔敢冒進；西班牙鋒線出現多位新丁，默契欠奉，加上近年碰頭例少交收，首戰必求穩陣，唔慌多波入，2.5球細盤值捧。

（開電視77台、有線661及601台周五凌晨2時45分直播）

由於拜仁喺上月中先勇奪歐聯，德國主帥勒夫相當識做，今次畀大部分拜仁球員休戰，包括隊長紐亞，拜仁陣中只得歷卡斯蘇尼及利萊辛尼入選。而同紐亞競爭激烈嘅2號門神達史特根，亦因傷要做手術掛免戰牌，阿仙奴門將賓特尼奴有機會擔正，不過佢都只係好番冇耐，狀態一般，勒夫亦堅持唔用老將中堅曉姆斯，為免防守錯漏百出，預計會起用3中堅陣式，配合瞻前顧後嘅兩閘泰路基拿及魯賓高辛斯，防守時隨時變成5人防線，穩陣行先。

鬥牛多新兵欠默契
另一邊廂，「鬥牛兵團」西班牙主帥安歷基今次亦召入大量新人，不過狼隊快翼艾達馬查奧爾，日前因確診新冠肺炎無奈退隊，皇馬翼鋒馬高阿辛斯奧尋日亦因傷退出，而且除艾利加西亞、利古朗、米基爾馬連奴外，前線新丁仲有費倫托利斯及巴塞17歲神童安素法迪，但連同洛迪高摩連奴及謝拉特摩蘭奴，呢條鋒線近乎未夾過咁滯，未必即刻有化學作用。

翻查紀錄，兩支歐洲勁旅近4次交手，夾埋只係入得5粒咁大把，全開2球或以下，今仗分組賽頭炮，大家都唔想先失威，睇怕都係少交收，2.5球嘅入球細咪走雞。