二線球隊要爭氣
周五凌晨歐國聯各級賽事開打，B4組嘅4隊波亦會登場，分別為保加利亞主場對愛爾蘭，同埋威爾斯作客鬥芬蘭。保加利亞自2004年後鮮有喺大賽決賽周亮相，不過近年有回勇之勢，今屆更升上B組作賽，呢場對住作客不擅入波嘅愛爾蘭，入球細啱數。

（周五凌晨2時45分開賽）

保加利亞對上一次出戰國際大賽決賽周已經係2004歐國盃，之後成績乏善足陳，不過現時由國內勁旅盧多格德斯、索菲亞利夫基斯及索菲亞斯拉維亞人腳組成嘅國家隊，踢法機動高效，主場出擊往往踢出超水準，例如上屆歐國聯賽事，保加利亞喺C3分組賽3場主場未輸過，面對斯洛文尼亞、挪威及塞浦路斯取得2勝1和，絕非任人魚肉。

上屆分組賽愛爾蘭4戰不勝
相比起保加利亞，愛爾蘭球員清一色喺英格蘭搵食，故名氣較高，今次嘅大軍名單入面，前線就有效力修咸頓嘅沙恩朗，後防亦有錫菲聯「孖寶」安達史堤芬斯同艾根，因此近年整體成績及表現稍比保加利亞優勝。

不過講到踢歐國聯，上屆愛爾蘭喺B4分組賽中，4戰不勝排包尾，4場比賽僅入1球，而且佢哋喺上年舉行嘅歐國盃外圍賽，4場作客亦只係贏過弱旅直布羅陀1比0，作客擺明唔識入波，預計呢場會係一場少交收比賽。

另一場B4組賽事，則有芬蘭主場對威爾斯，芬蘭近年實力有明顯進步，上屆歐國聯表現令人驚喜，6場分組賽取得4勝2負，當中3場主場更加全勝，獲得小組首名，今場佔地利，勝算甚高。反觀威爾斯有4位主力缺陣，球星加里夫巴利過去一季抖多過踢，狀態成疑之下，形勢不樂觀，芬蘭有力先下一城。

威爾斯「大聖爺」狀態不足
芬蘭近年已經擺脫魚腩行列，效力諾域治嘅前鋒迪姆普基，上季英超有11球進帳，可見整體人腳質素不俗。睇番芬蘭上屆分組賽同希臘、匈牙利、愛沙尼亞同組，都可以脫穎而出，其中3場主場取得全勝，兼不失球，表現無懈可擊，亦充分顯示佢哋地利優勢非常強大，今場必定把握機會力爭全取3分。

威爾斯受到傷兵問題困擾，早前已有4名球員因傷退隊，包括祖雲達斯中場艾朗藍斯、般尼茅夫翼鋒大衞布魯克斯、布里斯托城後衞艾殊利威廉斯，以及列斯聯前鋒泰拿羅拔斯，實力大受削弱。加上首席球星加里夫巴利過去1季喺皇馬長居後備，恐怕狀態不足，難同芬蘭抗衡。