歐國聯A4另一賽事，烏克蘭今晚主場迎戰上屆4強之師瑞士。烏克蘭由舒夫真高執教後，球隊以傳控踢法，慢慢打出好成績，歐國外更力壓葡萄牙取得小組首名出線，殊不簡單；瑞士上屆勇闖4強，近6場歐國聯5次開3球或以上，今場相信都係入球騷，捧2.5球大盤。

（國際財經台76、有線662及602台周五凌晨2時45分直播）

舒夫真高改革見成效
烏克蘭2016年由名宿舒夫真高接掌帥印後，雖然2018年未能打入世盃決賽周，但之後喺2020年歐國外力壓葡萄牙同塞爾維亞取得首名出線，其後再喺上屆歐國聯B級成為榜首升班，球隊雄心勃勃挑戰列強。

舒夫真高帥承安察洛堤及摩連奴兩位戰術大師，集合前者嘅傳控踢法及後者嘅管理方式，所以球員心悅誠服跟隨佢嘅改革步伐。踢前鋒出身嘅舒夫真高，今次中前場召入阿特蘭大中場馬利路夫斯基、韋斯咸前鋒耶莫蘭高及曼城翼衞辛真高等，鋒力強橫。

世界排名12嘅瑞士，繼續棄用利物浦翼鋒梳頓沙基利，依賴阿仙奴中場格列沙加、賓菲加前鋒施費洛域及翼衞列卡度洛迪古斯等，整體實力平均，佢哋上屆殺入4強，連季軍戰近6場歐國聯5次開3球或以上，入得又失得。由於同組仲有德國同西班牙，兩隊今晚都想搶分，今仗技術型大戰不妨再追入球大。