閃擊有料到！
今晚英超頭場賽事，曼聯主場硬撼「錘仔幫」韋斯咸。曼聯啱啱英足盃出局，對力爭聯賽前4戰意更堅，自復賽後聯賽連場報捷，中鋒安東尼馬迪爾亦搵番射門鞋，遇上已肯定上岸嘅韋斯咸，勢必藉主場之利先發制人，半場主勝有買趁早。

■（Now 621周四凌晨1時直播）

曼聯啱啱英足盃4強以1比3輸畀車路士出局，捧盃夢碎，不過「紅魔」今季首要目標，依然係下屆歐聯入場券，見佢哋對「車仔」正選收起安東尼馬迪爾、保羅普巴等主力，睇得出有輕重之分。曼聯復賽後氣勢如虹，近7場聯賽5勝2和未輸過，5場勝仗均至少贏2粒，弗到漏油。除咗「雙核」波基斯費南迪斯夥拍保羅普巴愈嚟愈夾外，前線「三叉戟」格連活特、拉舒福特及安東尼馬迪爾腳風奇順，其中馬迪爾今季聯賽已入17粒，係繼2008-09年度嘅安歷卡之後，單季英超入球最多嘅法國球員，特別係「波費」加盟後唔愁冇供應，令佢士哥不斷，信心爆棚。

錘仔幫作客腳軟
韋斯咸喺主帥莫耶斯帶領下，上仗主場以3比1擊敗屈福特後，已經肯定上岸，「護級專家」絕非浪得虛名。莫耶斯今場雖然倒戈，但韋斯咸眾將達成目標後，難免鬆懈，尤其防線甩漏唔少，以其近9場聯賽作客7度落敗劣績，實在不宜高估。曼聯主帥蘇斯克查擅打閃擊戰，近6場聯賽均於上半場取得領先優勢，其中5場由頭贏到尾，今仗為免夜長夢多，勢必盡快入波鎖定勝局，半場主勝有計。