爭直接升班
今晚係英冠煞科，全部12場會同時間開波，其中爭升班關鍵戰，2哥西布朗（圖）主場對住昆士柏流浪（QPR）。西布朗今仗只要贏波，就毋須理會其他勁敵嘅賽果，取得直接升班資格，加上近年碰頭食住QPR，讓兩球照捧讓球主勝。

■（周四凌晨2時30分開賽）

先講爭升班形勢，除咗1哥列斯聯已奪冠兼篤定升班外，另一直升位置仍懸而未決，第2嘅西布朗領先賓福特、富咸1及2分，較具優勢，富咸仲要得失球輸成條街，唔單止要望前面兩隊輸波，今晚自己仲要大勝韋根，反超前機會唔大。相反，西布朗只要今仗擊敗QPR，就肯定以亞軍過終點，與列斯聯攜手重返英超。雖然西布朗近期頻頻失分，但位處中游嘅QPR早就踢緊風流波，近8仗輸咗5場，唔會阻人發達，加上雙方近3次交手，西布朗唔單止贏晒，更加狂轟12粒，為咗重返英超呢個「金礦」必定搏盡，讓球主勝有計。

賓福特炒起班士利
至於3哥賓福特主場迎戰下游分子班士利，由於西布朗上輪失分，若果賓福特上輪贏史篤城就可殺上次席，可惜佢哋唔爭氣輸0比1，聯賽8連勝斷纜，兼且將主動權拱手讓出，堅唔抵。不過賓福特今季主場特醒，22次聯賽主場出擊，豪取14勝5和3負，暫與列斯聯、富咸並列主場成績最佳球隊，主場威力唔講得笑，遇上弱旅班士利會力求大勝，總之做好本分，再望奇迹出現，讓球主勝好路。