今晚續有西班牙盃8強對決，兩大班霸皇馬同巴塞分途出擊，其中皇馬於主場迎戰皇家蘇斯達。「銀河艦隊」箭頭賓施馬打破入球荒頻有士哥，重拾射門鞋，皇蘇留晒力踢呢場，中場馬田奧迪加特為博回巢誓要騷哥利，加上兩軍碰頭常演入球騷，大盤有買趁早。（周五凌晨2時開賽）

皇馬踏入2020年後順風順水，先喺沙特勇奪西超盃，接着聯賽連西盃豪取5連勝，包括上仗同市打吡以1比0擊敗死敵馬體會，結束近6次聯賽主場贏唔到「床單兵團」嘅魔咒，而一箭定江山嘅箭頭賓施馬，連續2仗有士哥，總算走出之前多場食白果嘅谷底，信心返晒嚟。養傷多時嘅王牌夏薩特已經好番，有傳今仗有機會於後備席候命，為嚟緊月尾歐聯16強對曼城熱定身，攻力進一步提升。

美斯紮住上 巴塞捱細界
另一邊廂，原屬皇馬嘅中場天才馬田奧迪加特，今季外借到皇蘇表現sharp醒，成為球隊進攻發電機，難得倒戈，為免再做「人球」必定施展渾身解數，博「銀河艦隊」下季重召歸隊。查實皇蘇非常重視呢場波，上仗聯賽對雷加利斯，正選收起奧迪加特、韋利安荷西及奧耶沙巴爾，前兩者係被追和後先落場搏殺，留晒力預備今仗，射手阿歷山大伊沙克近4仗入5粒，腳風超順。雙方近5次對碰，合共炮製21個入波，其中4場開4球或以上，鬥攻格局捧大更佳。

同晚另一場8強戰，上屆亞軍巴塞作客畢爾包。有指巴塞球王美斯受左腳大腿傷患困擾，但因箭頭蘇亞雷斯仲有排抖，佢呢幾場惟有帶傷上陣，而基沙文又唔太適應打中鋒，攻力略打折扣。畢爾包一向以硬淨見稱，近10仗僅1敗，有辦你睇，兩軍近5次交鋒，巴塞贏得2次咁大把，全開2球或以下，捧入球細好過。