．諾域治降班任人砌．
今晚英超獨腳戲，車路士喺主場迎戰「金絲雀」諾域治。車仔啱啱大敗失分，為保前4必搏盡搶分，遇上已篤定降班兼防線穿晒窿嘅包尾諾域治，隨時一開波即搶攻對手，中位數1.5球嘅半場大趁早買。

（Now 621周三凌晨3時15分直播）

車仔復賽後6場聯賽取得4勝2負，包括勇挫曼城「協助」利物浦提早封王，主帥林柏特應記一功。由於年輕箭頭「譚仔」譚美阿巴謙狀態唔及季初，「林伯」果斷用番本來已放入「雪櫃」嘅基奧特，仲將原本約滿嘅韋利安留到季尾，兩位老將亦交足貨，基奧特復賽後6場聯賽入3粒，韋利安亦有4球進帳及交出2次助攻，果然薑愈老愈辣。不過，林柏特上場忽然搵番「譚仔」擔正，最終作客慘吞錫菲聯3蛋堅肉酸，前4位置仍未穩陣，今場需要搶分，預計基奧特今仗打番正選肯定力爭士哥，車仔攻擊力有保證。

近4場聯賽半場開晒大
包尾嘅諾域治雖然場場都好落力，可惜實力有限，自從復賽後連輸6場，包括上場以0比4大敗畀韋斯咸，宣布提前降班，亦係英超史上首支5次降班嘅球隊，成班波冇晒信心，加上佢哋今季聯賽狂失67粒，防線穿晒窿，若果單計聯賽作客，「金絲雀」近8場更錄得1和7負，球員無心戀戰下，上半場好大機會已經先失守。

「藍戰士」上場慘敗，今場實搵「金絲雀」出氣，佢哋近9場聯賽入20球火力十足，有本錢一開波就搶攻，既然車仔近4場聯賽半場全開2球或以上，1.5球嘅半場大分頭唔錯，有買趁早。