今晚意甲獨腳戲，4哥國際米蘭主場硬撼拖連奴。國米連場失分，有傳干地帥位不穩，今仗誓要打爭氣波；拖連奴愈踢愈沉等做出氣袋，國米讓1/1.5球直取上盤。（myTV Gold 301、Now 638，有線654、614、662、602台周二凌晨3時45分直播）

國米自復賽後表現飄忽，先喺意盃4強畀拿玻里踢出局，近6仗聯賽贏得3場，已經跌落第4位，其中前仗主場對博洛尼亞，領先1粒兼大部分時間打多個下，表現不思進取，最終爆冷反輸1比2，上仗又喺末段失波畀維羅納逼和2比2，主帥干地備受質疑。

干地要保飯碗
雖然國米高層開腔撐干地，但雙方喺建隊方針上有分歧，干地想盡快捧盃，希望簽一批經驗豐富嘅「即食」球員，不過高層傾向年輕化，因此傳出前祖記教頭阿里基有機會入主，干地為保飯碗，未來幾場要踢得好好睇睇。查實干地執教後，球隊的確有所提升，盧卡古今季聯賽已入20粒，今仗更有巴斯東尼及迪岩布斯奧刑滿復出，陣容完整。

拖連奴近5場作客全敗，尤其係向來遇強即屈，近8仗對住祖記、拉素、拿玻里同AC米蘭都輸晒，今仗仲有前鋒施蒙尼沙薩坐波監，更冇還擊之力，首循環主場對國米都吞3蛋，今次造訪聖西路冇運行，上盤咪錯過。