英超下游球隊為護級豁出去！排聯賽尾3嘅阿士東維拉及尾5嘅韋斯咸已經企喺降班邊緣，唔想「墮崖」來季跌落英冠，今晚分途出擊一定搏命，不過佢哋嘅對手非善男信女，想攞晒救命3分絕對唔易。

維拉輸到慌捧紅軍半場Ｗ
今晚英超強弱懸殊之戰，1哥利物浦主場迎戰尾3嘅阿士東維拉。雖然紅軍已提早封王，但上仗有所鬆懈即慘吞曼城4蛋堅肉酸，為保冠軍顏面冇得再Hea踢，而且佢哋今季主場聯賽贏晒之餘，仲分外搶韁，護級分子維拉隨時半場都守唔住，半場主勝咪錯過。■（Now 621及611周日晚11時30分直播）

利物浦提早7輪奪冠，上仗係佢哋篤定捧盃後首場賽事，即作客畀死敵曼城蹂躪，成班波似乎仍沉醉喺首奪英超嘅歡樂氣氛當中，表現走晒樣。老實講辛苦咗成季，終於達標而有所鬆懈亦係人之常情，不過主帥高普出名高要求，突如其來嘅慘敗猶如解酒藥，畀「紅軍」盡快清醒，何況佢哋仍想打破曼城100分嘅英超最高積分紀錄，需要喺餘下6輪攞多15分，今仗不容再失。

維拉復賽未贏過
維拉雖然要搶分護級，可惜狀態堅差，單計復賽後4仗聯賽，只得2和2負未贏過，仲要入得兩粒咁大把，攻守都咁曳，就算有「維拉柏豪」基亞利殊助陣亦難單天保至尊。值得一提嘅係，利物浦主場威力驚人，今季16次聯賽主場贏晒不特止，有13仗喺上半場已取得領先優勢，可見佢哋每逢喺晏菲路出擊必定先發制人，相反維拉16次作客聯賽輸咗11場，單計近5次客場聯賽就有4次半場落後，見到都唔開胃，造訪急於反彈嘅「紅軍」，半場主勝更值博。

韋斯咸紐卡素大駁火
排16位嘅韋斯咸嘅搶分任務，就係今晚作客聖占士公園球場對戰紐卡素。兩軍周中都製造驚喜，紐卡素作客大炒般尼茅夫，創球隊今季聯賽最大勝仗；韋斯咸上場倫敦打吡擊敗車路士，亦打出今季漂亮一仗，兩支當弗球隊對碰肯定擦出火花，中位數2.5球入球大好路。

（Now 621周日晚9時15分直播）

雙方交鋒勁旺入波
未計昨晚賽事，「錘仔幫」韋斯咸經過32戰以30分排尾5，同降班區只有3分距離，烏克蘭老將耶莫蘭高上場入波，帶領韋斯咸3比2絕殺車路士，激起全隊士氣，亦為「錘仔幫」聯賽重開經歷2連敗之後，首度成功搶分，雖然今場作客出擊，但為搶分盡快上岸，一定唔會踢得保守。睇番韋斯咸近4次對「喜鵲」往績，原來各贏2次，彼此爭勝決心都強，今晚預期又一次出現駁火場面。

紐卡素自從有沙特財團入股消息傳出之後，球員場上表現積極，復賽後聯賽3戰2勝1和，3場合共轟入8球，呢8個入波分別來自6個球員，擺明個個爭取表現博留隊，唔會因為成功護級揸流攤，雙方近5次聯賽碰頭4次開總入球3球或以上，今場實同韋斯咸上演入球騷，大盤咪錯過。