意甲3哥國際米蘭今晚主場迎戰博洛尼亞，國米有豪華鋒線盧卡古及拿達路馬天尼斯，鋒力強橫，惟防線欠穩，導致近7場聯賽有6次總入球達3球或以上。博洛尼亞作客踢法亦進取，今場首選中位數2.5球嘅入球大。

（無綫myTV SUPER 301、Now 638及有線654、614、662、602台周日晚11時15分直播）

國際米蘭爭標機會渺茫，但已穩住前4位置，鎖定來季歐聯資格只係時間問題，可以放開嚟踢，更易製造入球。佢哋上場正選陣容收起首席射手盧卡古，都照樣以6比0大炒布雷西亞，6個入球分別來自不同球員，可見球隊攻擊點甚多。國米教練干地今場應該會派番出盧卡古踢正選，攻擊力勢必更加強勁，要取得入球唔難。

博洛尼亞作客照搶
另邊廂，博洛尼亞上仗主場以1比1打和卡利亞里失分，但要留意博洛尼亞作客對強隊偶有佳作，包括以2比1擊敗拿玻里、贏羅馬3比2，即使對榜首祖雲達斯亦只僅負1比2。同埋博洛尼亞近11場作客有9場總入球達3球或以上，今場捧中位數2.5球嘅入球大更佳。