衝冠關頭見好就收
西甲剩餘5輪比賽，爭標進入最後直路，皇家馬德里、巴塞隆拿今晚分途出擊俱遇硬仗，其中皇馬會喺早場作客畢爾包。畢爾包表現向來夠硬淨，以皇馬復賽後經常見好即收演出，相信呢場會係一場交收有限嘅比賽，首選2.5球嘅入球細。（Now 632及611周日晚8時直播）

今場作客嘅皇馬復賽勇不可擋，近6戰全勝，並乘着巴塞近4場聯賽3次失分，以4分優勢反壓對手於榜首帶頭，爭標形勢大好，但要留意「銀河艦隊」喺呢段頻密賽程期間，主帥施丹往往只求3分，領先後經常歎慢板，所以皇馬喺6場比賽入面加埋只入12球、失2球，近3場都開2球或以下，何況夏薩特仲足踝唔妥未必出得添。

畢爾包硬淨唔易啃
另邊廂，畢爾包停擺期間有老將阿度里斯宣布退役，不過對呢支擅打整體戰、以勇悍風格見稱嘅球隊冇太大影響，佢哋復賽後6場聯賽只輸1場，唯一敗仗係作客魯營球場僅負巴塞0比1，近4場聯賽贏3場，狀態可靠，而且佢哋主場出名難打，今季16場聯賽主場取得9勝4和3負，強如巴塞隆拿、馬德里體育會及維拉利爾作客都要失分而回，絕對唔易應付。

睇埋往績，原來皇馬近5次鬥畢爾包只贏過1次，其餘4次打成平手，兩隊加埋只入咗7球，4次總入球開2球或以下，足證兩軍近年交手形勢均非常接近，好難爭取入波，捧入球細最好路。