美斯搶入第700球
西甲3哥西維爾今晚主場迎戰榜首巴塞隆拿，雖然西維爾復賽後錄得1勝1和，連同停擺前聯賽6仗不敗，但佢哋近年對賽輸多贏少，「地上最強」爭標心切，加上球王美斯為取得職業生涯第700球肯定搏盡，今場簡單啲捧巴塞客勝。

（Now 632周六凌晨4時直播）

經過漫長停擺期後，西甲上周復賽就係由西維爾打頭陣，主場迎戰貝迪斯合演塞維利亞打吡，結果西維爾順利贏2比0打響頭炮，不過第2仗作客聯賽榜中游嘅利雲特，佢哋未能乘勇取得連捷，只能與對方踢成1比1平手，可見頻密賽程對兵源緊絀嘅西維爾頗為不利。

近7次交手6勝
西維爾依家排第3，喺歐聯席位之爭仍有一定優勢，但絕對不容大意，因為隨後嘅馬德里體育會僅落後2分，皇蘇同基達菲亦步亦趨，對佢哋造成一定壓力。不過西維爾整體實力始終同巴塞有一定距離，加上近7次交手又僅得1勝6負，明顯畀「地上最強」食住，就算想搶分都有心無力。

巴塞喺西甲重開首仗作客大勝馬略卡4比0，次仗返主場對雷加利斯亦贏2粒，球王美斯2仗都有進帳，佢喺場邊向隊友訓話嘅畫面令人印象深刻，亦可見球隊喺美斯「指導」下萬眾一心。美斯上場鬥雷加利斯射入職業生涯第699球，今場省多粒就達到700球里程碑，相信佢一定會落多兩錢肉緊，巴塞有望贏波再開W。