英超周五賽事打頭陣有諾域治主場迎戰修咸頓；依家排包尾嘅諾域治，護級形勢可以話水深火熱，最大問題係球隊入球能力嚴重不足，首席射手迪姆普基今季雖然有11球進帳，但當中有6球喺今季頭1個月拎到，今次主場都未必攻得破修咸頓防線，中位數2.5球入球細最抵玩。

（Now 621周六凌晨1時直播）

聯賽排包尾、降班機會高唱入雲嘅「金絲雀」諾域治向來入球能力欠奉，想偷雞贏波充滿難度，往往只能靠防守「保本」，就算主場出擊亦只能期望穩中求勝，所以停擺前4場聯賽主場賽事，總入球都開出2球或以下，包括死守之下0比1僅負利物浦，以及爆冷1比0小勝勁旅李斯特城。迪姆普基雖然係諾域治首席射手，但對上一次喺英超入波，已經係今年1月份，把握力嚴重不足。不過睇埋其他隊友更濕滯，全隊亦只有中場簡威爾入波多過1粒，試問今場邊有本錢向實力較佳嘅修咸頓搶分。

聖人作客先求穩
暫時位列英超14位嘅修咸頓，距離降班區域嘅球隊最少有7分差距，護級形勢未算太差，不過為求盡早上岸，每1分對「聖人」嚟講都相當重要。可惜修咸頓入球能力亦屬一般，踢咗29輪聯賽只係入咗35球，今場作客就更加擇使，畢竟「聖人」喺停擺前3場作客賽事輸晒，而且合共失咗10球，為止血今場必定會先加強防守，希望打突擊搶走3分，預料客軍踢法唔會冒進，入球細可以優先睇好。