俄超明晚再上路
俄超聽晚重開，周日凌晨仲爆發前列大戰，5哥莫斯科中央陸軍主場硬撼1哥辛尼特。今仗係復賽後雙方首場正式賽事，狀態點都爭啲，中央陸軍遇強唔敢亂攻，而且佢哋最鍾意玩拉布，喺停擺前6場聯賽5開半場和，值得追多鋪。

（周日凌晨零時開賽）

辛尼特穩站榜首，依家領先2哥莫斯科火車頭及3哥卡斯洛達9分咁多，早前仲同主帥施馬克續約，老將安約哥夫亦宣布掛靴，遲啲會加入教練團添。不過「伊朗美斯」阿斯蒙備受阿仙奴、 拿玻里及AC米蘭垂青，呢位前鋒明顯想走，只當辛尼特係踏腳石。

至於佢嘅好拍檔、入咗13粒位列射手榜1哥嘅迪斯尤巴，同樣畀英超熱刺睇中，雖然會方因為斟介拿玻里鋒將梅頓斯失敗後，已經一口拒絕咗熱刺，問題係呢位31歲老將卻係「主強客弱」，今季聯賽作客只係入得4球。睇番辛尼特今季10場作客聯賽，只係得1場攻入超過2球，而且未曾喺上半場落後，可見客場出擊都係穩中求勝。

迪沙高耶夫仲未好番
中央陸軍依家只落後卡斯洛達5分，爭取下屆歐聯外圍賽資格未絕望，不過「新沙皇」迪沙高耶夫未好番，中場艾克美度夫仲提早收咧添，好在後衞舒希尼哥夫趕及傷愈，不過兵源仍然捉襟見肘，就算主場出擊亦唔敢冒進。中央陸軍喺停擺前6場聯賽，雖然只得1勝3和2負，但有5場開半場和，睇嚟初段玩拉布頂得兩嘴，半場和不妨再追。