周五凌晨西甲頭場對決，艾拉維斯地頭出擊迎戰皇家蘇斯達（圖中）。艾拉維斯陣中多位主力缺陣，搶分能力冇保證，呢場對住要力保前4席位嘅皇蘇，難逃輸波命運，捧客勝好過。

（Now 632周五凌晨1時30分直播）

頭號射手未傷愈
艾拉維斯喺復賽後首戰就輸波，淨吞護級分子愛斯賓奴2蛋，依家排喺第15位，絕對唔可以掉以輕心。今仗艾拉維斯前鋒祖斯盧辛馬田坐完波監復出，弊在佢嘅好拍檔盧卡斯佩雷斯就冇咁好彩，未必趕得切痊愈，今季佢哋29個聯賽入波中，有超過三分一係同呢位頭號射手有關，加上隊長文奴加西亞倦勤，主力門將費蘭度柏捷高又要停賽，必定大大削弱球隊整體實力。

相反皇蘇陣容齊整好多，除咗今季大放異彩嘅皇馬借將馬田奧迪加特有望繼續披甲之外，奧耶沙巴爾、阿歷山大伊沙克、韋利安荷西同樸圖等進攻好手都隨時候命，皇蘇有足夠本錢撕破對手防線。加上兩隊近5次聯賽交手，皇蘇有4次都贏到波，包括今季聯賽碰頭以3比0輕取對手，呢場皇蘇有望再下一城，客勝值得留意。