拉莫斯爭做帶刀侍衞No.1
今晚西甲快車壓軸大戰，2哥皇家馬德里喺B隊嘅迪史堤芬奴球場硬撼華倫西亞。「銀河艦隊」近年對親華倫，都踢得相當開放，隊長沙治奧拉莫斯殺得性起，誓要做西甲頭號「帶刀侍衞」，為爭冠不容有失，華倫則要爭取躋身歐戰席位，預計今仗雙方會大駁火，2.5球嘅入球大穩開。

（Now 632及611周五凌晨4時直播）

皇馬喺聯賽停擺期間冇比賽，球員得到充分休息之餘，更有機會調整體能狀態，其中夏薩特嘅情況備受關注。呢名比利時翼鋒被視為C朗離隊後「銀河艦隊」嘅新領軍人物，可惜佢加盟以來一直受傷病困擾，原本好大機會提早收咧，點知突然停擺畀佢休養生息，上仗重開贏伊巴3比1之役即交出助攻，造就隊長沙治奧拉莫斯攻入佢第67個西甲士哥，如果拉莫斯今仗再有進帳，就超越巴塞名宿「重炮手」朗奴高文，成為西甲史上入波最多嘅後衞，為獨佔頭號「帶刀侍衞」之名，必落力爭取士哥。

兩軍交鋒慣性對攻
事實上，皇馬確係全民皆攻，連同上仗左閘馬些路建功，佢哋今季聯賽共有19名球員有進帳，係歐洲5大聯賽中入波人數最多嘅球隊。不過，皇馬上仗早早領先3粒後，下半場踢得勁hea，激到主帥施丹發火，賽後喺更衣室捉住班球員「照肺」，而「沙拉」作為後衞，經常殺得性起谷上前，兼且右閘丹尼爾卡華積又有傷上陣成疑，令防線存隱憂。

另一邊廂，8哥華倫西亞上仗打吡戰喺末段開紀錄，諗住贏硬利雲特，點知守將莫達迪亞卡拜喺補時8分鐘於禁區內犯規，搞到輸12碼被逼和1比1，原本幾乎到手嘅3分，咁樣嘔番2分出嚟堅慘，連埋停擺前在內，莫達迪亞卡拜連續兩場聯賽累球隊輸3球12碼，絕對係計時炸彈。不過「蝙蝠兵團」對親皇馬都唔太輸蝕，近14次碰頭只輸6次，其中12次開3球或以上，可見兩軍交鋒例鬥攻，2.5球嘅大盤熱得有道理。