意甲周末重開前，今晚深夜率先上演意大利盃決賽，拿玻里同祖雲達斯喺中立場羅馬奧林匹高球場爭奪冠軍。從兩軍上場意盃4強次回合表現可見，經過長達3個多月休戰後，球員狀態欠佳，加上決賽一戰定生死，雙方踢法應傾向保守，首選2.5球入球細。（周四凌晨3時開賽）

拿玻里喺日前意盃4強次回合憑梅頓斯建功，主場追和國米1比1，兩回合計贏2比1晉級。拿玻里該場踢得好吃力，全場大部分時間處於劣勢，倚靠不惜氣力嘅跑動補位及門將奧斯賓拿神救，先至成功抵擋國米嘅狂轟猛炸，匆匆再戰體力輸蝕。

另一邊廂，祖記喺意盃4強次回合主場只能悶和ＡＣ米蘭0比0，兩回合計打和1比1，祖記僅靠作客入球較多進身決賽。王牌C朗該仗仲射失12碼，係佢加盟祖記後16次操刀極刑之中，第2次「宴客」，可見復賽後佢腳風真係好唔順。主帥沙利賽後坦言，只對球員頭30分鐘表現滿意，反映出經過3個多月停擺後，祖記球員狀態仍有待提升。

近年決賽旺細盤
踏入一場定勝負嘅決賽場合，雙方難免會踢得小心翼翼；翻查紀錄，以法定時間90分鐘計算，近11屆意盃決賽，有8屆總入球開2球或以下。當中祖記曾5闖決賽，雖然4度封王，但法定時間僅得2勝2和1負，並有4次總入球開2球或以下，何況大家仍未上力，今場不妨轉向細盤埋手。