．萊比錫主場冇鑊氣．
周四凌晨續有多場德甲上演，3哥RB萊比錫會喺主場鬥護級分子杜塞爾多夫。萊比錫聯賽重開後主場表現比作客差，今場讓球主客和讓2球博唔過；杜塞爾多夫上場補時僅負多蒙特踢出鬥志，不妨冷敲讓球

客勝。■（Now 671及FOX+、有線652及612台周四凌晨2時30分直播）

RB萊比錫復賽後聯賽6場未輸過，不過3次贏波都係作客，反而主場連和3場，包括1比1打和包尾大幡柏達邦，水準並唔穩定，佢哋依家以31戰62分排第3，剩番3輪比賽，只要Keep住唔輸，前4位置都好穩陣，今場隨時先保不失，再伺機突圍，大勝機會唔大。

撬黃喜燦頂迪姆華拿
論球員表現，自從傳出迪姆華拿改赴英超搵食後，呢位RB萊比錫前鋒明顯冇季初咁Sharp醒，有報道指萊比錫已準備從「姊妹球隊」薩爾斯堡接收南韓翼鋒黃喜燦做佢接班人，可見華拿離隊已成定局，餘下比賽仲會唔會搏盡好成疑問。

未計周三凌晨賽事，杜塞爾多夫同尾2嘅雲達不來梅同得28分，為咗護級絕對唔會放鬆。佢哋復賽後6戰只係輸過畀拜仁同多蒙特，其中上場鬥多蒙特更踢至補時最後一刻先失守輸0比1，表現唔失禮，呢場隨時再有神來之筆，讓球主客和主隊讓2球太多，寧捧讓球客勝。