阻拜仁提早封王
德甲周中開快車，榜首拜仁慕尼黑今晚作客雲達不來梅，只要贏波便可宣布完成8連霸偉業，不過不來梅亦要搶分護級，絕對唔會輕易就範。睇番拜仁近5次作客不來梅，從未試過淨勝3球或以上，拜仁今場讓兩球唔值博；不來梅近7次主場聯賽有6次開半場和，乘上場大勝柏達邦餘威，有機頂到半場唔輸，波童冷敲半場和。（無綫85台、Now 670及FOX+、有線651及611台周三凌晨2時30分直播）

主場聯賽旺半和
拜仁上場雖有羅拔利雲度夫斯基及湯馬士梅拿停賽，不過仍靠小將約舒亞舒克斯及哥列斯卡各建一功，主場2比1險勝慕遜加柏，續以7分領先2哥多蒙特，贏埋今場就可以提前封王。拜仁兩大主力今場雙雙復出，對手又係護級球隊，難怪客W熱到只得1.1倍，讓球盤及讓球主客和都要讓兩球。睇番拜仁今季15場作客聯賽只有6場冇失波，而且佢哋連盃賽在內，近5次作客不來梅雖然贏晒，最叻嗰次都只係贏2比0，其餘4次全部一球上落，今場要淨勝3球先贏盤，值博率唔高。

不來梅已經連續13場主場聯賽未贏過，好彩佢哋上場喺護級大戰大勝柏達邦5比1，護級重現生機，依家佢哋同尾3嘅杜塞爾多夫同分，以3分落後尾4嘅緬恩斯，目標係搶得1分得1分，呢場必擺鐵桶陣死守。不來梅對上7場主場聯賽有6次頂到半場唔輸，就算慕遜加柏、多蒙特等前列隊伍易邊前都攞唔到甜頭，半場和有分頭值得一博。