新季開鑼 主場王亮相
受疫情影響而延期嘅瑞典超，今晚終於開鑼，尾場之一由上季季軍哈馬比主場迎戰奧斯達辛斯。哈馬比獲伊巴謙莫域注資後，備受關注，挾上季主場王強勢，可望大炒打響頭炮，直取讓球主勝！（周日晚11時30分開賽）

哈馬比上季表現出色，最終同亞軍馬模同分，只落後冠軍佐加頓斯1分屈居第3，絕對係超額完成。佢哋今季捲土重來，曾效力馬模嘅瑞典Icon伊巴謙莫域，不惜得罪母會入股死敵，令哈馬比人氣急升。雖然射手迪祖迪積離隊，幸多名上季主力仍然留隊，包括上季合共入24粒嘅穆亞馬坦高域及卡加尼基歷，今季仲簽入赫根前鋒包連奴，呢位巴西外援近5季喺瑞典超累積60球進帳，如虎添翼。

奧斯達辛斯財困搞唔起
奧斯達辛斯近年受財困影響，唔單止主力不斷流失，自從有料教練樸達重返英倫後，戰績不斷下滑，上季只排第12位，雪上加霜係陣中首席射手伊斯拉莫域，今季又轉投挪超班霸洛辛堡。哈馬比上季15場聯賽主場獲13勝2和，13場勝仗當中有10次至少贏2球，加上踢法進取，上季聯賽勁轟75粒，單計主場就入49粒，兩項數據均冠絕瑞典超，今晚必趁主場氣勢攞頭彩，強捧讓球主勝。