大佬都傷埋史浩克堅黑
今晚德甲壓軸尾場有史浩克04主場迎戰利華古遜。史浩克被黑氣纏繞變咗「史好黑」，中後場多名重心提早收咧之餘，今場連後防大佬沙利夫辛尼都傷埋唔出得，相反利華古遜剛殺入德盃決賽，士氣大振，加上仍要力爭下季歐聯入場券，挾近8場作客7勝1和氣勢，可以輕取史浩克04，利華作客讓一球，放心捧上盤。（Now670、有線651及611台周一凌晨零時直播）

史浩克04黑到冇朋友，中場兩大核心蘇奧沙達及夏列特喺重開不久即重創，隊長馬斯卡利亦要提早收咧，而拿斯達錫、史譚保利、古多貝斯托拿亦接連受傷，今場連沙利夫辛尼都冇埋，兵源極為短缺，想排個正正常常有競賽能力嘅陣都有啲難。

史浩克自歇冬後首場擊敗慕遜加柏，跟住連續12場聯賽未贏過，破咗球會史上最長不勝紀錄，其中5月停擺後重開5場，僅得1和4負，士氣沉落谷底，球員都踢到無心戀戰，上場對柏林聯全場捱打，今場鬥實力更高嘅利華古遜，唔會頂到幾耐。

夏維斯復出「藥廠」爭前4
利華近14場聯賽豪取10勝1和3負，包括擊敗多蒙特、慕遜加柏等前列分子，上場聯賽喺王牌夏維斯缺陣下，雖然以2比4反敗畀榜首拜仁慕尼黑，但表現唔差，周中德盃4強仲迅速反彈輕取沙貝魯根3比0入決賽，士氣大振。

當然，「藥廠」最主要目標仍然係爭前4，利華現時同4哥慕遜加柏同分，只要對手稍有閃失即可取而代之，加上夏維斯今場強勢復出，球隊近8場作客7勝，包括歐霸盃遠赴葡萄牙同蘇格蘭都凱旋而歸，遇上態沉嘅「礦工」3分手到拿來，上盤好路。