B隊場擺陣唔會冒進
今晚西甲重頭戲，2哥皇家馬德里迎戰下游球隊伊巴。由於巴拿貝進行擴建工程，皇馬今場會喺B隊用開嘅迪史堤芬奴球場擺陣，嚟到呢個較為陌生嘅球場，相信雙方球員都需時適應，何況皇馬今季防守表現比進攻出色，甚少大炒對手，停擺前聯賽連盃賽4場全開3球或以下，捧3.5球嘅入球細最穩陣。（Now 632周一凌晨1時30分直播）

唔計周日凌晨賽果，皇馬落後巴塞2分，為保爭標1分都不能少。然而，對皇馬嚟講除咗要「後追」令心理壓力加重，鑑於西甲重啟後要閉門作賽，毋須擔心入座率，皇馬會方就索性停用巴拿貝主場並展開擴建，將復賽後餘下主場賽事搬去迪史堤芬奴球場舉行。雖然呢度亦係皇馬一隊平時練波嘅場地，不過喺「細場」踢正式比賽，短期嚟講都會有負面影響。

況且，經過長達3個月休戰期，一眾球星亦未必可以即時回復十足狀態，尤其係傷愈冇耐嘅夏薩特同馬高阿辛斯奧，所以唔好期望皇馬今場可以踢出以往喺巴拿貝嘅主場氣勢。

伊巴屯兵後防攻力疲
未踢今輪比賽前，排第16位嘅伊巴比尾3嘅馬略卡只多2分，仍未脫離降班威脅，不過佢哋今季13場聯賽作客僅獲1勝5和7負，排聯賽倒數第2，搶分機會微乎其微，而且中場主力干沙路艾斯卡蘭迪停賽，勢必更加屯重兵喺後防。皇馬今季防守表現比進攻出色，27戰聯賽僅失19球，只有4次試過單場攻入4球或以上，睇埋皇馬停擺前聯賽連盃賽，連續4場皆開3球或以下，捧中位數3.5球細盤最穩陣。