各位讀者好耐冇見，講波前先講吓歷史，公元1347年，一場瘟疫「黑死病」籠罩整個歐洲，死亡數字以千萬計，打擊甚大，成為中世紀歐洲文藝復興嘅導火線，令文化、工業等大大興起。從上年開始，突如其來嘅新冠肺炎疫情蔓延全球，感染死亡人數比「黑死病」嚴重得多，亦影響各項體育活動，連歐國盃、美洲盃及東京奧運都要延期1年。

面對呢場世紀戰「疫」，大家都需要諗計拆解，好似香港賽馬會，雖然照樣保持每周兩個賽馬日，但唔准馬迷入場，並且關閉所有投注站，只能睇住電視直播，透過網上投注，既可減低因人群聚集而令病毒傳播，同時盡量減低損失，抵讚！

我不得不佩服以紀律見稱嘅德國，經過多月停擺後，德甲喺上月中正式重賽，係歐洲4大聯賽中首個重開嘅聯賽，西甲喺上周中亦復賽，而意甲、英超都快將重開，無論作為球迷、球員、球隊班主，甚至當地政府都係樂見，因為足球已非單純只係比賽，亦貫穿商業、旅遊、稅收等等，之前一下子全部停擺，影響猶如骨牌效應。

經歷如此重創後，點樣先可以重新振興球壇呢？我認為一眾高薪球星應該壯士斷臂，透過減薪幫球隊度過難關，咁樣可為復興踏出重要一步，呢招絕非空口講白話。講番足球，雖然利物浦與拜仁喺所屬聯賽奪冠幾無懸念，但西甲「皇巴」之爭，以及意甲嘅祖記與拉素仍咬得好緊，總算為球迷喺炎炎夏日帶嚟驚喜。文:黃興桂