今晚另一場德甲，柏林聯主場鬥史浩克04；兩軍聯賽重開後都冇好過，今場勝負好睇臨場發揮；柏林聯近10場主場聯賽5勝2和3負，當中5場冇失波，踢法硬淨，對住唔識入波兼態沉嘅史浩克，捧2.5球細盤好路。

■（Now 670、有線651及611台周日晚9時30分直播）

兩隊近況都曳
今場兩軍近況可謂難兄難弟，柏林聯重開後4戰只得1分，史浩克更係4連敗，正宗「海軍鬥水兵」。如果單計主場，柏林聯近10場攞到5勝2和3負，3場輸波對手分別係拜仁、利華古遜及賀芬咸，表現唔算失禮，而且其餘5場贏波全部保持冇失波，今場有一定搶分機會。

史浩克重開後4連敗，好彩上半季搶夠分先唔使護級，未計上周六晚成績，佢哋排聯賽榜第10位，真正唔上唔落，今晚仲有主力韋斯頓麥堅尼停賽，實力進一步削弱。佢哋踢咗29輪聯賽僅入34球，仲差過一啲護級球隊，所以唔好對佢哋進攻有咩期望。

論近況柏林聯勉強叫好啲，不過既然柏林聯對上5次主場贏波唔係1比0就係2比0，轉捧細盤仲穩陣。