移師中立場更加小心
今晚續有兩場葡超上演，頭場比蘭倫斯主場鬥甘馬雷斯，比賽將會移師中立場上演，掛名主場嘅比蘭倫斯佔唔到咩優勢；甘馬雷斯作客踢法好穩陣，防守有番咁上下，預計入波唔會多，捧中位數2.5球細盤好路。

（周五凌晨2時開賽，馬會網上文字直播）

未計周四凌晨賽果，比蘭倫斯領先尾2嘅樸迪莫倫斯10分，護級壓力不大。連同停擺前聯賽，比蘭倫斯近4場聯賽2勝2和未輸過，而且4場均能保持清白身，防守相當有水準。不過由於比蘭倫斯主場未能通過衞生總局審查，今仗被逼移師里斯本嘅奧埃拉斯足球之城舉行，失去地利之助，相信比蘭倫斯會比之前踢得更為小心。

甘馬雷斯復賽後首仗以2比2逼和士砵亭，仍有機會爭取歐霸入場券，球隊停擺前8場聯賽作客僅輸1場，兼且近5場有3仗保持冇失波，踢法穩中求勝，今場勢難出現大手交易，入球細值博。

唐迪拉鬥艾維斯半和好路
至於尾場唐迪拉主場對艾維斯，唐迪拉連停擺前近6場聯賽未贏過，當中5次開出半場和，其中上場重開後首戰守和賓菲加0比0更士氣大振；艾維斯近5場聯賽1和4負續排包尾，降班幾成定局，不過佢哋上述5場聯賽亦有4次開出半場和，兩隊同樣不擅攻，不妨再追多次半場和。

（周五凌晨4時15分開賽）