除西甲外，西乙亦喺今個周末返嚟，周日晚有場拉科魯尼亞主場對希杭。希杭排名遠高於拉科，但佢哋每逢作客例必腳軟，拉科要搶分護級一定搏盡，主場出擊遇上「私房菜」，值得秤先。

（周日晚11時開賽）

希杭作客打折扣
希杭依家排第8位，落後「6哥」艾爾切5分，雖然聯賽仲有成11輪，爭取升班附加賽資格未絕望，但呢支由前拉科及華倫西亞名宿杜傑執教嘅球隊，向來靠主場搵食，客場表現大打折扣。翻查紀錄，希杭今季15場聯賽作客，只得3勝4和8負，喺西乙客場榜只排尾5，真係曳到冇朋友。

佔主場之利嘅老牌球會拉科現正沉淪至尾4，好在同「安全線」尾5嘅阿爾巴塞特同分，護級仲有希望。儘管有安尼高保維達、穆查沙迪克未好番，中場域陀莫尼祖亦要坐波監，不過佢哋擺脫開季頭20輪贏得1仗嘅頹勢，停擺前11輪取得7勝2和2負，包括一波7連捷，盡顯護級決心。其中日本國腳柴崎岳，喺拉科上年年尾改由費蘭度華斯基斯回歸接手後，上陣機會漸多，成為球隊從谷底反彈嘅原因之一，不過佢喺抗疫期間日日留喺屋企陪住索爆女星老婆真野惠里菜，真係有啲擔心佢腳仔軟。雙方近5次交鋒，拉科錄得4勝1和未輸過，明顯食住希杭。