韓職星期六有場前列大戰，由蔚山現代主場迎戰FC城南，兩隊波日前包辦晒韓職5月份最佳球員同教練，呢場「最佳」大戰當然夠晒睇頭。

（周六下午3時30分開賽）

蔚山現代今季聯賽仲未輸過，早前連和兩場陷入小低潮後，上輪重振雄風，作客4比0大炒浦項制鐵，巴西射手祖利亞尼加奧又有入波，開鑼5場波勁轟第6球，獲選為韓職5月份最佳球員實至名歸，尤其上場入兩粒嘅李青龍受傷患困擾，祖利亞尼加奧嘅發揮就更加重要，不過以蔚山現代今季5戰入13球嘅超強火力，相信要入波難唔到佢哋。

城南借用羅相浩
FC城南目前排第4位，上場意外輸畀FC大邱先至被打破不敗身，主帥金南一就獲選為韓職5月最佳教練。事實上城南本身屬於守強於攻嘅球隊，今季只失3球同榜首全北汽車睇齊，但為咗加強入球能力，日前宣布向日職球會FC東京借用前鋒羅相浩，呢位23歲新星之前踢FC光州，2018年喺K2出場31次入16球，入球能力有保證。城南銳意加強進攻能力，今場作客蔚山現代或會一改作風踢得進取，入球大值得留意。