今晚葡超頭場由兩支中下游分子對碰，馬里迪莫主場迎戰塞圖巴爾。馬里迪莫鋒力疲弱，今場仲有前鋒艾加哥斯達要繼續停賽，進一步削弱攻擊力，想攻都攻唔嚟。塞圖巴爾踢風流波，冇壓力隨時有驚喜演出，加上對績往績佔優，受讓下捧讓球客勝。

（周五凌晨1時開賽，馬會網上文字直播）

馬里迪莫現以24戰得24分排第15位，領先尾2嘅樸迪莫倫斯8分，護級壓力唔大，佢哋停擺前9場聯賽僅得1勝3和5負，當中5場食白果，鋒力疲弱欠破關板斧。馬里迪莫停擺前3場對比蘭倫斯、布拉加同摩里倫斯輸晒，仲要全部都係半場落後，球員明顯無心戀戰。何況表面上今場馬里迪莫係主場出擊，但閉門作賽冇球迷叫喊聲鞭策，班波更加會hea踢。

塞軍風流波或有驚喜
塞圖巴爾暫排聯賽榜第12位，比今場對手馬里迪莫多4分，既無降班威脅、爭踢歐洲賽機會亦微，名副其實風流波，但心理壓力唔大更有助發揮。塞圖巴爾停擺前雖然6場聯賽不勝，不過當中對手包括「Big 4」波圖、布拉加及賓菲加，失分情有可原，當中逼和爭緊冠軍嘅賓菲加踢出鬥心。球隊近5次聯賽鬥馬里迪莫獲得3勝1和1負，不敗率達8成，心理佔優，讓球客勝必捧。