力爭升班主場必搶
今晚德乙獨腳戲，「3哥」漢堡主場迎戰基爾。漢堡向來重攻輕守，加上佢哋專靠主場搵食，為爭逐升班資格，一定藉地利搶攻，遇上同樣有前冇後嘅基爾，隨時大駁火，2.5球入球大咪錯過。（myTV SUPER周二凌晨2時30分直播）

漢堡之前接連出戰升班勁敵比勒費爾德及史特加，最終只得1和1負，未計周日賽果，佢哋仍落後次席史特加2分，而且後面嘅海登咸亦來勢洶洶，無論係爭頭兩名嘅「直升」資格，定係保住前3嘅升班附加賽席位，漢堡都需要積極搶分。

兩隊都重攻輕守
漢堡今季擅於主場搵食，14場主場聯賽取得10勝2和2負，成績僅次於史特加。可惜佢哋攻強守弱，今季聯賽雖勁入55粒，係德乙火力最強一隊，但防守就認真麻麻，至今失咗35球，上仗對住弱旅韋恩都兩度失守，只係險勝3比2，攞到聯賽重開後首場勝仗，重攻輕守特性非常明顯。

作客嘅基爾都係以踢法進取見稱，自聯賽重開後，4戰共入7粒，但場場都有失波，全開3球或以上，包括曾以3比2擊敗史特加，以及上仗對住榜首比勒費爾德僅輸1比2，睇得出佢哋冇乜壓力下，遇強都唔會縮。基爾今仗有防中米菲特續坐波監，分分鐘索性以攻代守，今仗大有機會出現鬥攻格局，捧2.5球嘅大盤最上算。