今晚德甲尾場中下游對決，奧格斯堡主場硬撼科隆。奧堡仍有一定降班威脅，希望藉地利搶分盡快上岸；科隆後衞施巴斯坦波拿奧繼續坐波監，隨時以攻代守，2.5球嘅入球大乃不二之選。■（Now 670、有線651及611台周一凌晨零時直播）

兩軍自聯賽重開後表現不濟，奧格斯堡近4仗聯賽只得1勝1和2負，所贏嗰場係擊敗狀態更差嘅史浩克04，不能作準。連同停擺前在內，奧堡近9仗聯賽輸咗6場，未計今輪賽果，只領先尾3嘅杜塞爾多夫4分，為求盡早上岸，主場出擊必搶攻望擸晒3分。

科隆踢法有前冇後
另一邊廂，原本停擺前走勢唔錯嘅科隆，喺聯賽重開後大走樣，近4仗只得2和2負，仲失咗11粒，除咗侯普特曼、韋斯特拉迪、馬素懷斯、祖安哥度巴等受傷外，多明歷達斯拿及施巴斯坦波拿奧亦要停賽，尤其係後者缺陣，對防守影響甚大。不過科隆攻力唔曳，箭頭莫迪斯迪近3仗聯賽省2粒，重拾射門鞋，佢哋近12仗聯賽轟入27粒，但僅得3場保持清白之身，全開3球或以上，明顯係有前冇後、打死罷就，今仗造訪奧堡勢必用進攻掩飾防守漏洞，大盤更值得捧場。