樸迪莫倫斯強隊點心
葡超重開首仗即被對手悶和嘅賓菲加再上征途，今晚作客樸迪莫倫斯。賓菲加矢志後上奪冠，依家已經再冇失分空間，況且上仗和波激嬲一班球迷，今場必定加多兩錢肉緊，遇上「強隊點心」樸迪莫倫斯，3分手到拿來；既然賓菲加近4次交手3次贏2球或以上，放心捧賓菲加讓球客勝。（周四凌晨2時15分開賽、馬會網上文字直播）

賓菲加於葡超重開首戰，主場只能與唐迪拉互交白卷，佢哋全場出現26次射門，但竟然冇一腳能夠轉化成為入波，差劣表現激嬲一班喺場外守候嘅球迷，賽後更向接載球員嘅隊巴擲石頭，以致前鋒安迪查施夫高域及中場祖利安韋高被車窗玻璃碎片割傷，要送去醫院接受治療。賓菲加球迷嘅怒氣絕對可以理解，畢竟宿敵波圖之前1日全失3分，「里斯本雄鷹」只要贏波就可以升上榜首，結果眼白白錯失機會。依家賓菲加同波圖雖然同分，但因葡超賽制規定，聯賽同分的話先計算對賽成績，賓菲加兩循環均不敵波圖，因此爭標形勢處於被動。

力爭大勝挽面子
上場錯失搶分機會加上激嬲球迷，令賓菲加更加唔可以鬆懈，今場對樸迪莫倫斯必定全力搶分。樸迪莫倫斯25戰只得19分排尾2，今季主場對其餘3支Big4球隊包括布拉加、波圖及士砵亭全部輸波，堪稱「強隊點心」。實力超班嘅賓菲加為免大意失荊州，預計今場打開紀錄後仍會繼續搶攻，務求大勝挽回面子。