周四凌晨葡超賽事，波圖主場迎戰馬里迪莫；波圖重開後首仗即陰溝裏翻船，狀態明顯未到十足；馬里迪莫自知技不如人，作客相信亦唔會輕舉妄動；以波圖上場表現，今場「讓球主客和」讓二球唔值博，改捧中位數2.5球細盤仲好路。

■（周四凌晨4時30分開賽、馬會網上文字直播）

葡超上周中重開，波圖作客即以1比2不敵法馬利卡奧，令人大跌眼鏡，好彩勁敵賓菲加喺主場亦被弱旅唐迪拉悶和失分，暫時波圖仍以較佳對賽成績壓住對手。從上場對法馬利卡奧之役所見，波圖眾將行軍速度偏慢，門將馬捷斯更犯下低級錯誤，將隊友回傳直接傳畀法軍前鋒法比奧馬田斯，「助攻」對手射入空門先開紀錄，表現慘不忍睹，加上中場奧達維奧艾美臣累積黃牌夠數，今場需要坐波監，為免再度失大意波，相信一眾球員會踢得更加小心。

馬里迪莫踢慣穩陣波
今場作客嘅馬里迪莫喺聯賽重開後首仗以1比1賽和塞圖巴爾，暫時以25戰得25分排第15位，領先尾2嘅樸迪莫倫斯6分，護級壓力暫時得到紓緩。馬里迪莫對上9場作客聯賽只入2球，攻擊力嚴重不足，所以作客多數大踢穩陣波，有8場總入球開2球或以下就係好例子。至於雙方近4次交手，波圖取得3勝1和，不過只有1次能夠淨勝3球或以上，其餘3次總入球都開2球或以下，今場波圖主Ｗ冇肉食，「讓球主客和」讓二球又太多，轉捧2.5球細更穩陣。