德甲重開暫時要閉門作賽，點知連球會吉祥物都冇豁免！周日科隆主場對緬恩斯，佢哋嘅「山羊九世」就冇辦法喺場邊遊行同埋督師，需要避席。呢隻科隆吉祥物喺球會地位極高，有專人服待同飼養，但新冠肺炎當前，就算復賽揭幕戰咁緊要，佢都唔可以「踩場」。據德國傳媒報道，科隆嘅吉祥物上次冇喺主場比賽出現，要追朔到12年前，2008年「山羊七世」因為骨關節炎缺席咗兩場賽事，而2000/01年賽季，佢因為口蹄症被禁止出場，最後球會諗到用一個紙牌代替，唔知今次又會唔會翻炒呢條橋呢？

德甲係歐洲「4大」中首個復賽嘅聯賽，自然不容有失，為咗減低感染風險，每場只容許300幾名工作人員入場同喺場館附近，連球迷都唔可以靠近球場及聚集。