刨定資料等5.16重開
除咗德甲之外，德乙同樣會喺5月16日重開。雖然榜首比勒費爾德一枝獨秀，但緊隨其後嘅史特加、漢堡及海登咸，3隊只有4分差距，佢哋爭取直接升班或升班附加賽資格，爭持依然激烈，今日《東方波經》集中火力，分析呢4隊嘅爭升班形勢，為聯賽重開做定功課。

比勒費爾德 攻守都掂直升穩膽
比勒費爾德開咧唔算太順，不過原本帶頭嘅史特加及漢堡頻頻失分，造就佢哋後來居上，依家以6分甩開「2哥」史特加，喺榜首領導群雄。

比勒費爾德上次喺德甲亮相，已經係2008/09年度球季嘅事，之後仲衰到跌落德丙，直到2015/16年度球季先升番上德乙。上季季中接手帶隊護級成功嘅主帥奧侯斯，今季簽入貝寧國腳施比奧蘇古，全面釋放球隊攻力，前線三叉戟法比安高路斯、禾格斯森馬及施蒙艾蒙臣，合共轟入31球，其中法比安高路斯更以16球排緊射手榜「1哥」，兼交出5個助攻。事實上，呢個箭頭過去9季效力比勒費爾德，有7季入球達雙位數字，絕對唔嘢小，難怪比軍暫以50球成為德乙火力最強球隊。

三叉戟堅勁不敗率逾9成
比勒費爾德唔單止攻得，喺今季聯賽只失24球，係德乙失波最少球隊，攻守兼備，25輪聯賽只曾兩負，不敗率逾9成。正因如此，佢哋主、客戰績都幾平均，如單計作客聯賽，13仗取得8勝4和1負，成績甚至比主場更好，亦係德乙客場王，呢13仗入面有11次半場冇失波，穩中求勝嘅策略明顯奏效。比軍剩番9輪有4場作客，最惡啃嗰場係造訪爭升班勁敵漢堡，但若果佢哋保持穩定水準，要喺聯賽封王直接升班嘅機會都幾樂觀。

史特加 飄忽係最大絆腳石
上季由德甲降班嘅史特加，今季開咧頭8仗取得6勝2和，一度高踞榜首，可惜踢法重攻輕守，導致季中連番失分，搞到畀比勒費爾德反超6分，認真差勁。

重攻輕守遇弱冇勝算
史特加銳意捲土重來，今季留住3名前德國國腳馬里奧高美斯、卡斯特羅及畢斯杜巴，前中後三線骨幹猶在，亦係佢哋開咧帶出嘅原因。值得一提嘅係，史特加主場特醒，13場聯賽主場取得10勝1和2負，共轟27球，係停擺前主場成績最好嘅球隊，可惜呢班波衰在唔穩定，經過強勢開局後，竟然喺停擺前17仗贏得7場，其中面對漢諾威、辛特侯遜、韋恩、奧斯納貝克等弱旅都失分，表現咁飄忽，成為爭標最大絆腳石。呢支聯賽「2哥」嘅餘下賽程中，仲有主場對漢堡嘅關鍵戰，史特加應該專心保住亞軍嘅「直升」資格，方為上策。

漢堡 客場失分重災區
漢堡前季首度由德甲降落德乙，上季又喺大好形勢忽然跌Watt，連升班附加賽資格都搶唔到，滿以為佢哋今季痛定思痛，點知又係重蹈覆轍，令人失望。

未來硬仗連場
漢堡除咗保留肯特、柏柏杜普路斯等主力外，更簽入軒達斯亞、桑尼傑圖及夏歷，3人至今喺聯賽共入22粒，實力有增無減，開咧12場聯賽取得7勝4和1負，一度壓過史特加升上榜首。

不過呢支老牌勁旅作客麻麻致失分頻頻，佢哋擅於主場搶分，停擺前12場主場聯賽取得9勝1和2負，主場成績僅次於史特加。但相比之下，今季13場作客聯賽贏得3場咁大把，客場勝率只得23％，亦係佢哋季中不斷失分嘅「重災區」，嚟緊仲要造訪史特加、海登咸、格雷特霍夫等前列分子，繼續咁樣主強客弱，隨時連「3哥」嘅升班附加賽資格都保唔住。

海登咸 防守穩健有驚喜
「4哥」海登咸經過出閘脫腳後漸入佳境，倚靠出色嘅防守，而且趁住史特加、漢堡不斷失分，一步一步咁殺上前列位置，令佢哋爭取升班嘅夢想，不再遙不可及。

海登咸自2014/15年度升上德乙後，表現平穩，上季34場聯賽失45球，係失波第三少球隊，最終只落後季軍柏林聯2分排第5位，失去升班附加賽資格。

最叻初段玩拉布
今季海登咸保留大部分主力，並且買斷之前兩季表現不俗嘅前鋒基連甸斯特，呢位土炮射手今季有12粒進帳，喺兩大守將奧利華侯辛、霍倫巴治加盟後，進一步鞏固防線，停擺前25場聯賽只失26粒，僅次於榜首比勒費爾德，成為失波第二少球隊。

睇番海登咸最叻係初段玩拉布，25場聯賽當中，有14次開半場和，最終取得6勝6和2負。呢班波現時只係落後漢堡、史特加3分及4分，唔好話爭踢升班附加賽，甚至搶埋亞軍「直升」都有機會呀！