面子之戰加多幾錢肉緊
德甲今周重開，焦點除咗周六晚嘅魯爾區打吡，周日晚科隆主場對緬恩斯亦值得留意。緬恩斯主帥比爾羅斯亞季初畀科隆炒魷，今次倒戈當然想還以顏色，不過科隆換咗現任教頭基斯度後，球隊全面復甦，其中7次主場出擊只係輸過畀班霸拜仁慕尼黑，其餘6場攞到5勝1和，為咗證明冇換錯人，科隆今場更要加多幾錢肉緊，主W有買趁早。

上季德乙冠軍科隆早前公布有3名球員確診新冠肺炎，一度令德甲重開出現變數，好彩「中招」3人喺最新一次檢測已「由陽變陰」，暫時鬆番口氣。科隆今季開咧不順，頭11輪聯賽只得2勝1和8負排第17位，為免繼續沉淪，球會高層決定辭退季前接手嘅比爾羅斯亞，由前漢堡教練基斯度接手。

基斯度主場領軍勝率逾7成
基斯度上任後頭3場聯賽雖然只得1分，但經過熱身後戰績全面冒升，打後11場聯賽攞到8勝3負，3場輸波對手分別係拜仁、多蒙特及慕遜加柏，面對同級球隊相當有把握，如果單計主場，基斯度領軍7戰5勝1和1負，勝率超過7成。科隆停擺前於聯賽排第10位，比第6位嘅史浩克04少5分，甚至有機會衝擊來屆歐霸盃參賽資格。

比爾羅斯亞敗走科隆後，相隔9日就火速接掌另一支陷入降班危機嘅球隊緬恩斯，佢喺上任後先後擊敗賀芬咸及法蘭克福，不過蜜月期好快結束，球季停擺前，球隊依舊排喺榜下游第15位，比尾3嘅杜塞爾多夫只多4分，而且佢哋今季25場聯賽輸15場，係包尾大幡柏達邦之外，聯賽輸波次數最多球隊，比爾羅斯亞想以呢張成績表向舊主「示威」似乎冇咩用，科隆主Ｗ值得睇高一線。