世歐洲:羅拔佬爭金球獎造勢 有利波蘭開入球騷
时间：2021-11-18 09:02 来源：足球图库
今晚世盃外歐洲區I組煞科戰，波蘭主場迎擊匈牙利。波蘭爭首名機會渺茫，但隊長羅拔利雲度夫斯基弗到漏油，入波當食生菜，一定落力數胡博攞金球獎，而且佢哋主場出戰世盃外例演大騷，2.5球大盤屬信心之選。
（有線665及605台周二凌晨3時45分直播）
波蘭目前落後榜首英格蘭3分，數字上仲有機會後來居上，不過「三獅兵團」今輪只係對魚腩聖馬力諾，和波都夠首名出線，但唔代表波蘭今仗會放軟手腳，皆因全隊要力撐隊長羅拔利雲度夫斯基。
「羅拔佬」前年帶領拜仁榮膺6冠王，當年金球獎因疫情取消，令佢錯失捧獎良機，好彩佢未有氣餒，今年各項賽事已經累積入咗62粒，包括上輪梅開二度，協助波蘭大勝安道爾4比1，趁住美斯及C朗近期沉沉哋，依家全隊上下都為「羅拔佬」爭金球獎造勢，必定為佢製造更多數胡機會。
匈牙利止跌隨時鬥攻
匈牙利上輪大勝聖馬力諾4比0，近4仗取得2勝1和1負，總算成功止住早前連場不勝嘅頹勢，對士氣有一定幫助，冇心理包袱下隨時豁出去。翻查紀錄連同上屆在內，波蘭近8仗世盃外主場出擊，7次開3球或以上，一於再追入球大。
