皇馬讓主天「羅」地網

     經常被人當笑話嘅賓尼迪斯，今晚就會首度率領皇家馬德里喺國冠盃澳洲墨爾本站登場，想塞住批評者把口，最好方法梗係贏波啦，撞正對手羅馬都未上力，銀河艦隊勢開「讓主」歡迎肥賓。（周六2，有線61、64、201及203台香港時間17:00直播）

　　羅馬上仗熱身賽輸波

　　雖然占士洛迪古斯早前為哥倫比亞踢美洲國家盃而延遲歸隊，法比奧干查奧又因傷冇被列入大軍名單，不過皇馬陣中依然有基斯坦奴朗拿度、艾斯高同埋莫迪歷等球星撐場，加上門將基羅拿華斯據報迅速傷癒，唔使跟哥斯達黎加踢美洲金盃，反而可替皇馬國冠盃上陣，對佢講都係好事，畢竟卡斯拿斯已經轉投波圖，銀河艦隊又未搵到新門將，基羅拿華斯如果把握到機會，下季由佢擔正都唔係奇事。

　　賓尼迪斯拉隊到達澳洲墨爾本之後，第一件事唔係談論自己首次領軍有乜感想，而係批評比賽場地好差，怕會有球員受傷，不過新加盟右閘丹尼路雷斯就一於懶理，佢強調希望可以披甲亮相，同剛續約丹尼爾卡華積爭一席正選，睇銀河艦隊班球員鬥志都唔錯，落場唔會流攤。

　　羅馬夏天先後同比利時中場尼恩高蘭同埋老將施度基達續約，另外有耶高法爾基加盟，離隊一隊球員只係得後衛賀利巴斯，變動絕對唔大，可惜佢開操後首場熱身賽就輸波，爆冷以1:2不敵匈牙利乙組球隊加爾莫，激到教練魯迪加西亞紮紮跳，照情況睇羅馬真係未操起，撞正皇馬教練賓尼迪斯首度領軍要威，今戰捧銀河艦隊開「讓主」合理。