阿仙奴讓客「愛」不釋手 問鼎英超亞洲挑戰盃

     愛華頓同阿仙奴會師新加坡國家球場，爭奪英超亞洲挑戰盃冠軍，兵工廠領隊雲格賽前講明將以強陣出擊，捷克鋼門施治更演處子作，睇嚟拖肥糖都要俯首稱臣，捧兵工廠開「讓客」成為終極王者。（周六15，now621台晚上20:30直播）

　　首輪對賽史篤城陣，其實愛華頓出好多主力，米拿拉斯、巴利、巴克利、奧士文、湯卡華利、賴史密夫同埋迪路菲奧都踢半場，而比利時前鋒盧卡古同埋美國老牌門將侯活更加打足90分鐘；不過埋單都係同史篤城踢成0:0，要靠互射12碼淘汰對手晉身英超挑戰盃決賽，戰果頗令人失望。而領隊馬天尼斯都事先張揚，祖爾盧保斯今仗會取代侯活把關，呢位西班牙門將雖然兩年前曾經幫韋根捧走足總盃，但經驗始終係差。

　　阿仙奴首輪以4:0輕取新加坡明星隊，戰果絕對係意料之內，當日買兵工廠球迷亦應該賺到笑，既然係咁，今仗對拖肥糖就不妨再推多次，事關領隊雲格已講明最少輪換9名球員，適逢佢上仗出好多新人，換言之今晚會見到唔少星級主力登場，包括基奧特同艾朗藍斯，相信連大演帽子戲法艾卡邦都要先退居後備，而捷克鋼門施治亦會上演佢加盟阿仙奴後處子戰，前中後實力都有保證，開「讓客」捧盃走唔甩。

　　史篤城季軍戰冇走雞

　　今晚英超亞洲挑戰盃先打頭陣仲有場季軍戰，東道主新加坡明星隊會同史篤城爭安慰獎，刻意扒冷冇意思，都係簡簡單單捧史篤城開「讓客」穩陣。（周六8，now621台晚上18:00直播）

　　新加坡明星隊陣中有阿根廷中場尼高拉斯華利斯同埋法國後衛施里拿卡馬拉等外援，但係對住英超球隊明顯冇料到，而史篤城相信會派出兩位新援門將基雲同埋前英格蘭國腳後衛格連莊臣擔正，首戰休息前鋒馬美迪奧夫都會落場，講卡士一定贏晒，頭場尾場一於買晒「讓客」過關。