利物浦讓客「獅」人醒

      利物浦繼續佢地嘅熱身之旅，今次到澳洲同布里斯班獅吼拍跳，贏面依然好大，事關兩軍實力有一定差距，加上利記急於磨合新陣容，友賽場合都唔留力，買「讓客」等「布」佳音。（周五1，有線61、64、201及203台周五下午4:45直播）

　　布里斯班獅吼澳職收咧後踢兩場比賽，其中一場係亞冠盃不敵浦和紅鑽，提早執包袱出局，並導致球會宣布更換教練，由艾萊斯走馬上任，而呢位新帥腳頭認真唔錯，因為獅吼首場友賽即爆冷大勝西甲維拉利爾3:0，不過佢今仗想再製造冷門賽果並唔容易，事緣隊長麥特麥基同埋後衛迪維利因傷倦勤，中後場實力大減，最終大比數落敗唔出奇。

　　史達寧呢位反骨仔轉會之後，利物浦反而可更專心為新球季備戰，而佢上場友賽輕取泰國明星隊4:0，一班新兵舊將亦仿如注入強心針，新隊長佐敦軒達臣該仗交出兩個助攻固然搶鏡，外借回收比利時前鋒奧歷治亦取得士哥，加上幾位新兵包括丹尼艾格斯、占士米拿、約瑟高美斯、尼達利基尼同埋阿當保丹已經全部粉墨登場，領隊羅渣士可以繼續利用熱身之旅磨合陣容，遇布里斯班獅吼當然唔會手軟啦，預期紅軍眾將會繼續數胡，「讓客」好易中！