苏拿利考牌战撞正大哨
皇马迎击华拉度列
皇家马德里炒左洛佩特吉后，周中西盃以4比0大胜美利拉重振雄风，不过对暂代教练苏拿利嚟讲，周六晚先系真正考验，呢位皮里兹任内最年轻教头，首场西甲会喺主场迎战华拉度列，后者由前皇马名将「大哨」朗拿度「揸旗」后战绩飙升，苏拿利呢场考牌战合唔合格就要问过呢位旧队友。
（Now 632周六晚11时15分直播）
唔讲唔知，今年42岁嘅苏拿利原来系会长皮里兹任内最年轻教练，比当年施丹上任时43岁仲细一年。苏拿利上场西盃收起加里夫巴利、莫迪历及却奥斯等常规正选，起用新加盟嘅巴西小将云尼斯奥斯祖利亚伙拍宾施马攻坚，呢位被誉为「新尼马」嘅18岁新星喺皇马二队表现出色，依家跟苏拿利上一队相信会有更多表演机会。皇马目前喺联赛排第9，落后榜首巴塞7分，如果想保持争标机会真系要加把劲。
华拉度列自从由「大哨」成为大股东后，只喺联赛输过1场畀艾拉维斯，其馀联赛加盃赛7战5胜2和，依家联赛排第6，排名仲高过皇马。苏拿利同「大哨」喺2002至05年一齐效力皇马，曾经携手协助皇马赢得02/03年西甲冠军，今场各为其主冇情讲，睇吓到底系苏拿利教波肋、抑或大哨做领导有计？
炒洛帅仅赔300万欧元
另外，之前有报道皇马炒洛佩特吉要赔3年合约一共1800万欧元补偿金，不过原来当日签约嗰阵，皇马加左条款，就系洛佩特吉在2019年1月1日之后被解僱，皇马先至要赔足，如果捱唔够半年被炒，皇马只须赔偿半年年薪共300万欧元，所以皇马把握时机，喺国家打吡大败后手起刀落，外间唔会有閒话，又唔使赔大旧钱，会长皮里兹果然有生意头脑。