將會變陣出擊嘅阿仙奴，英聯盃主場迎戰甲組仔黑池。兵工廠上周聯賽失咗2分，爭標處於被動，嚟緊又會鬥利物浦，盃賽留力係必然，不過唔需要擔心阿仙奴二線兵威力，「MK仔」米希達利恩同韋碧克始終有一定級數，傷愈復出嘅門將施治把守最後一關亦夠穩陣，相信要炒黑池幾粒唔係問題，讓球主客和讓二球都捧讓球主勝。

（周四凌晨3時45分開賽）

兵工廠各項比賽11連勝紀錄斷纜，其實唔係好大件事，始終要Keep住不停贏點都有少少壓力，好似條橡筋咁愈拉愈緊，反而和咗1場，畀球會上下鬆一鬆仲好。喺嚟緊周日對利物浦之前，周中聯賽盃有過冷河作用，主力休息之餘，球隊失分後唔使即刻對紅軍，二線球員又可以趁機表現吓身價，堪稱一舉三得。

黑池英聯盃作客近9戰輸7次
因此，今場阿仙奴無論出乜嘢陣容，發揮唔會太大影響力，而且本身喺盃賽搏殺嘅米希達利恩同韋碧克，加上中場仲有艾利尼同伊禾比支援，級數都遠比黑池高。黑池除咗喺今屆第2圈作客贏過唐卡士打，對上8次英聯盃作客1和7負，嚟到酋長球隊都係等劏，冇力頂住兵工廠。