林柏特領兵倒戈
「林伯」返藍橋倒戈鬥車！今晚英格蘭聯賽盃16強話題之戰，由車路士主場對越級挑戰嘅英冠「綿羊」打比郡，焦點落喺車仔名宿、現時升呢「綿羊」教頭嘅林柏特，首度以主帥身份重返史丹福橋球場倒戈，到底一眾車迷會支持邊隊呢？不過車仔王牌夏薩特有傷上陣成疑，而且盃賽場合例出副選，加上打比郡上圈淘汰曼聯，信心爆棚，「讓球主客和」仲受讓二球咁筍，斯維就撐「林伯」嘅打比郡讓球客勝。

（周四凌晨3時45分開賽）

雖然唔及啱啱掛靴嘅泰利般根正苗紅，但林柏特喺車仔地位一樣咁崇高，自2001年上「車」後，喺史丹福橋球場度過咗13個球季，以中場球員身份轟入211球，成為車仔史上士哥王，協助呢支倫敦球隊捧走聯賽、聯賽盃、足總盃、歐聯及歐霸等重要錦標，絕對係「黃金戰車」嘅Icon。「林伯」上年於美職掛靴，今夏接過打比郡嘅帥印，教得有聲有色，唔單止帶領「綿羊」位居英冠「6哥」，並喺上圈英聯盃爆大冷，互射12碼淘汰佢恩師莫連奴麾下嘅曼聯，前鋒哈利威爾遜更入咗球靚波，唔講得笑。

車路士出副選炒唔起
當然車仔實力勁「綿羊」好多，喺新帥沙利接手後開季聯賽10場不敗做緊「3哥」，不過呢位意大利教頭於盃賽場合，經常派副選出戰，而且王牌夏薩特受背傷困擾，上場聯賽對般尼已經缺陣，今場亦未必出得，冇咗呢位比利時隊長壓陣，無論係創造力定埋門一腳點都差啲，另一前鋒柏度洛迪古斯上仗傷出，攻力受削。何況「讓球主客和」車仔要讓到2球咁辣，斯維覺得「綿羊」頂盡小敗1粒，「+2」咪錯過。