Big 5決鬥捱眼瞓都值
今晚英超深夜場熱刺主場對曼城，由於英國冬令時間剛開始，香港時間將延遲一小時開賽，又要考驗一眾球迷嘅忠誠度。衞冕嘅曼城今季聯賽未嘗一敗，但熱刺絕對係有力成為攔路虎，加上溫布萊球場尋日先踢完美式足球，草地質素隨時對側重地面進攻的曼城造成影響，樂比推介受讓半一嘅熱刺下盤。

（Now 621周二凌晨4時直播）

曼城上季以破紀錄嘅100分封王，今季強勢依然持續，開季9場聯賽取得7勝2和佳績，並且係入波最多同失波最少球隊，不過論作客表現始終冇主場咁Sharp醒，早前作客晏菲路一役備受壓力，最終打和0比0，另外亦曾被狼隊爆冷踢和1比1，故熱刺今仗唔係冇機會。

雖然好多人都認為熱刺係「Big 5」之中最弱一隊，但喺曼城領隊哥迪奧拿眼中，熱刺領隊普捷天奴先係佢最欣賞嘅教頭，佢咁講唔係專登笠高帽，而係普帥處理戰術細節上相當精準，即使人腳班底唔算豪華，依然持續踢出風格，連哥帥都話成日睇片學到嘢。

迪利阿里擅破城
正如頭先所講，熱刺唯一輸蝕就係板櫈深度唔夠強，除要分心應付歐聯同聯賽，球員大部分又係國家隊主力，所以開季幾個月已經征戰頻繁，歐戰成績亦唔理想，幸好本周英超安排喺周二凌晨舉行，球員有多啲時間休息，主場以逸待勞務求搶分成功。

由於熱刺新主場仲未搞掂，上半季仍要借用溫布萊球場作主場，咁啱呢個場尋日先踢完美式足球，對主攻及擅長地面推進嘅曼城肯定有影響。再者，熱刺今場亦收到好消息，就係迪利阿里可以復出，佢曾經喺哥帥執教嘅曼城身上射入兩球，今仗隨時再成曼城剋星。