德乙德甲打孖上
缅恩斯狼堡铺铺讲和

今晚尾场德甲，暂排联赛第7位嘅缅恩斯，主场出战第5位嘅「狼堡」禾夫斯堡，两军近季可以话系沙煲兄弟齐上齐落，上季双双艰难护级成功，今季开季又齐齐喺冇人睇好下踢出令人意外好成绩，目前同样4战得7分，又齐齐喺上轮被打破今季不败身。佢的唔只遭遇相似，连阵式亦同样用4321，更巧合嘅系两军近两年半来5次碰头，结果全部和波收场，今晚赛前评估亦同样系五五波，建议再追有3.15倍分头嘅和局。

计牌面，缅恩斯原本应该再睇低啲，佢的今夏一如以往，流失多名重心球员，防线领袖艾度迪亚路重金加盟多蒙特，前线食胡人物武藤嘉纪转投纽卡素，中场扫荡嘅苏奥沙达亦畀史浩克04挖走，只补入一批冇乜名气嘅年轻球员，但佢的季初嘅表现竟然比上季好，季初两胜1和后，上仗作客利华古逊虽然1球仅负，但计表现其实输得有啲唔抵，而佢的呢场嘅11个正选球员，平均年龄只有22.8岁，更加创下左球会喺德甲嘅最年轻正选纪录添！

小鬼当家数据亮丽
至于禾夫斯堡上季靠附加赛险胜至唔使降班，今季引入嘅两位前锋丹尼尔真锡克同韦格贺斯亦唔算大牌球星，但凭住每人走多一步，季初成绩远比预期好。缅恩斯同禾夫斯堡阵中球员大多数年纪轻名气细，但胜在实而不华，仲有亮丽数据支持，缅恩斯嘅21岁左闸艾朗马田，今季交出23次传中球冠绝德甲，而禾堡嘅防守中场伊拿斯奥甘马曹，就以68次拦截暂时做左德甲截击王。既然两军瓣瓣都咁相似咁接近，今晚碰头好可能继续讲和。